Uncategorized – Síða 5 – Hið íslenska bókmenntafélag

3.490,- / 2.792,-

Frumspekin I

Aristóteles

Þýðing: Svavar Hrafn Svavarsson sem einnig ritar inngang.

Eftir heimspekinginn Aristóteles er varðveittur gríðarlegur fjöldi rita sem spanna flestar þær fræðigreinar sem til voru um hans daga. Áhrif hans á skólaspeki miðalda eru vel kunn og hugmyndir hans og hugtök hafa mótað heimspekisöguna allar götur síðan. Þetta rit er fyrsta bók hans af fjórtán um „hina fyrstu heimspeki“ eða frumspeki, það er að segja um það sem er til.

Líkt og á ýmsum öðrum sviðum heimspekinnar er framlag Aristótelesar til frumspekinnar ómetanlegt. Hann tók viðfangsefnið skipulegum tökum eins og endranær og setti fyrstur manna fram heilsteypta greiningu á lykilhugtökum þess. Þar með lagði hann hornsteininn að þeirri fræðigrein sem átti eftir að vera miðlæg í vestrænni heimspeki lengst af sögu hennar. Þessi hluti verksins hefur form sögulegrar greinargerðar fyrir kenningum forvera Aristótelesar, frá hinum fyrstu heimspekingunum og fram til Platons, og er gríðarlega mikilvæg heimild um þennan hluta heimspekisögunnar. Hið sögulega yfirlit þjónar þeim tilgangi að styðja eigin kenningu Aristótelesar um hinar fjórar frumorsakir alls sem er, með því að hann sýnir fram á hvernig eldri heimspekingar hafi smám saman áttað sig á orsökunum; þeir fyrstu gerðu aðeins ráð fyrir efnisorsökum, en svo áttuðu menn sig á að fleira þyrfti að koma til, til að mynda uppspretta hreyfingar. Platoni telur Aristóteles það til tekna að hafa áttað sig á formlegri orsök, en sér þó ástæðu til þess að gagnrýna frummyndakenningu læriföðurins í löngu máli.

Orsakir einhvers eru samkvæmt kenningu Aristótelesar efni þess, form, uppspretta hreyfingar eða aflvaki og loks tilgangur þess. Þessar frumorsakir gefa endanlega útskýringu á hlutnum,öllum spurningum um hann verður svarað með tilvísun til þeirra, og þessum útskýringum má beita til að skilja það sem er til. Í inngangi sínum að Frumspekinni skýrir Svavar Hrafn Svavarsson hvernig Aristóteles hugsar kenningu sína og hvernig hann sá fyrir sér frumspeki sína yfirleitt, auk þess að gefa yfirlit yfir efni og uppbyggingu verksins.

Eftir Aristóteles hafa einnig verið gefin út sem Lærdómsrit Siðfræði Níkomakkosar og Um skáldskaparlistina
.

7.900,- / 6.320,-

Fullveldi í 99 ár

Ýmsir

Bók þessi er gefin út í tilefni af sextugsafmæli Davíðs Þórs Björgvinssonar. Bókin geymir ritgerðir samferðamanna hans á ýmsum fræðasviðum auk lögfræði og eiga það sammerkt að lúta að fullveldishugtakinu sem hefur verið Davíð Þór hugleikið á fjölþættum starfsferli.

Davíð Þór hefur sinnt kennslu- og fræðastörfum sem prófessor við Háskóla Íslands og Háskólann í Reykjavík og sem prófessor í alþjóðlegum mannréttindum við Kaupmannahafnarháskóla. Árið 2004 var hann skipaður dómari við mannréttindadómstól Evrópu í Strassborg og gegndi því embætti í níu ár. Eru þá ónefnd ýmis trúnaðarstörf á sviði laga og réttar.

Davíð Þór er afkastamikill og virtur fræðimaður og eftir hann liggja fjölmargar ritsmíðar um lögfræðileg efni. Helstu rit hans eru Barnaréttur (1995), EES-réttur og landsréttur (2006), Lögskýringar, Kenningar, aðferðir og sjónarmið við skýringu og beitingu laga (2008) og loks bók sem byggð er á doktorsritgerð hans við Háskólann í Strassborg árið 2013, The Intersection of International Law and Domestic Law. A Theorectical and Practical Analysis.

9.900,- / 7.920,-

Fyrsti arkitektinn

Björn G. Björnsson

Rögnvaldur Ágúst Ólafsson hefur verið kallaður fyrsti íslenski arkitektinn. Hann fæddist að Ytri Húsum í Dýrafirði árið 1874 og ólst upp á Ísafirði. Hann lauk prófi frá Lærða skólanum 1901 og sigldi til Hafnar til náms við Det Tekniske Selskabs Skole sama ár. Þótt hann lyki ekki námi í húsagerð vegna veikinda var hann fyrsti Íslendingurinn sem fékkst einvörðungu við að teikna hús.

Þótt starfstími hans yrði aðeins um 12 ár liggja eftir hann fjölmargar byggingar víða um land, margar meðal þess fegursta sem til er í íslenskri húsagerð. Má þar nefna Hjarðarholtskirkju í Laxárdal, Húsavíkurkirkju, Breiðabólstaðarkirkju í Fljótshlíð, Hafnarfjarðarkirkju, Keflavíkurkirkju, Pósthúsið í Reykjavík og mörg íbúðarhús við Tjörnina.

Vífilsstaðahælið var hans stærsta verk og þar lést hann sjálfur úr berklaveiki árið 1917, aðeins 42 ára að aldri. Þessi bók var tekin saman þegar 140 ár voru liðin frá fæðingu hans. Í henni er fjallað um nálega 100 hús eftir Rögnvald í máli og myndum.

3.490,- / 2.792,-

Galdrafárið í Evrópu

Hugh Trevor-Roper

Þýðing: Helgi Skúli Kjartansson sem einnig ritar inngang.

Galdrafárið í Evrópu er athyglisvert rit eftir einn af kunnustu sagnfræðingum Breta, Hugh Trevor-Ropers, sem tekst hér á hendur að rannsaka og leita skýringa á bylgju ofsókna í Evrópu á hendur meintu galdrafólki á tímum endurreisnar, upplýsingar og vísindabyltingar. Galdrafárið var þversagnakennt fyrirbæri og að mati höfundar um margt hliðstætt við gyðingaofsóknir á 20. öld, sem hann þekkti vel úr samtíma sínum og rannsóknum.

Bókin ber ritsnilld Trevor-Ropers ekki síður vitni en víðtækri þekkingu hans á evrópskri hugmyndasögu. Hér er ekki til umfjöllunar hjátrú og kukl alþýðu manna sem fyrirfundist hefur á öllum tímum, heldur leitast höfundurinn við að varpa ljósi á orsakir, framgang og endalok ofsóknaræðisins í samhengi við hugmyndasögulega strauma tímabilsins og þjóðfélagsþróun. Niðurstaða hans er sú að umfang galdrafársins, þá staðreynd að það stóð í heilar tvær aldir og ógnarvald rannsóknarréttarins sé ekki hægt að skýra með einangruðum og móðursýkislegum hugarburði kirkjunnar manna, heldur hafi það átt sér rætur í þjóðfélagsaðstæðum, átökunum um siðaskiptin og því sem bæði endurreisnarstefnan og vísindabyltingin sóttu í forna dultrú. Trevor-Roper rekur þessa þræði um alla álfuna og beinir sjónum að hugmyndaheimi hinna lærðu manna tímabilsins, sem nánast engir urðu til að rísa upp á móti ofsóknunum, en reynir líka að skýra hvernig alþýða manna gat gengist á hönd hugarfari sem umbar og hvatti til ofsóknanna. Lýsingarnar á atburðum þessarar óhugnanlegu sögu eru eftirminnilegar en leiðarljós höfundarins er að einnig hinir myrkustu kaflar mannkynssögunnar séu ómissandi til skilnings á henni.

Í inngangi þessarar útgáfu gerir þýðandinn, Helgi Skúli Kjartansson, Trevor-Roper og verkum hans nokkur skil, auk þeirra deilna sem uppi hafa verið um rannsóknir hans meðal sagnfræðinga. Loks lætur hann fylgja fróðlegt yfirlit um sögu galdraofsókna hér á landi.

3.490,- / 2.792,-

Germanía

Cornelius Tacitus

Þýðing: Páll Sveinsson.
Inngang ritar Guðmundur J. Guðmundsson.

Germanía er annað rit Tacitusar sem kemur út í röð Lærdómsrita. Sagnaritarinn segir hér frá germönskum þjóðum villimanna sem voru nágrannar Rómverja í norðri, lýsir þjóðfélagsgerð þeirra, staðháttum og siðum einstakra þjóðflokka. Verkið á því mest skylt við mannfræði, en markmið höfundar voru líkast til í og með pólitísk og án efa siðferðileg, enda lítur höfundur á það sem hlutverk sagnfræðingsins að leggja dóm á verk þeirra sem stjórna gangi sögunnar. Í Germaníu má hvarvetna lesa á milli línanna fordæmingu á hinu lastafulla líferni Rómverja andspænis dyggðum Germana, þótt skýrt komi fram að víst séu ýmsir ágallar á lifnaðarháttum þeirra.

Um höfundinn, sem einnig lét eftir sig stórvirkin Annales og Historiae, er fátt vitað utan það að hann var uppi á fyrstu og annarri öld eftir Krist og átti farsælan embættisferil en hófst til virðingar fyrir sagnfræðistörf sín og mælskulist. Þess ber að geta að sagnfræði þeirra tíma var talin til listgreina og sjálfsagt að höfundur slíkra verka tæki sér skáldaleyfi, ýkti og sleppti að greina frá því sem honum þótti síður mikilvægt. Rík áhersla var lögð á stíl og hljómfegurð textans og bera verk Tacitusar þess glöggt vitni. Hann er þó talinn fara iðulega rétt með staðreyndir og ýmislegt sem hann segir um germönsku þjóðflokkana hafa fornleifafundir staðfest. Þessi bók er því merk heimild um lifnaðarhætti Germana, átrúnað þeirra og siði, og þeim mun dýrmætari sem fáar aðrar samtímaheimildir hafa varðveist.

Þar að auki er frásögn Tacitusar hin skemmtilegasta aflestrar. Hann lýsir hrjóstrugu landslagi svæðisins, frumstæðum landbúnaði ættbálkasamfélagsins og hugprúðum og baráttuglöðum íbúunum. Fólkið er sagt gestrisið, matargerð einföld en konur skírlífar og fari sjálfar með uppeldi barna sinna, öfugt við það sem tíðkaðist meðal Rómverja. Leti Germana er þó átalin, jafnframt sóðaskapur, óhófleg drykkja og spilafíkn, svo eitthvað sé nefnt.

Þýðing Páls Sveinssonar frá 1928, sem hér er endurútgefin, er einkar læsileg. Guðmundur J. Guðmundsson hefur endurskoðað skýringar Páls og ritar einnig inngang þar sem samskipti Rómverja við Germani eru rakin og grein gerð fyrir sagnfræðingnum Tacitusi.

Annað verk höfundar, Agricola, þar sem segir frá Bretlandi og hernaði Rómverja á hendur þarlendum þjóðflokkum, hefur einnig verið gefið út sem Lærdómsrit.

3.490,- / 2.792,-

Gorgías

Platón

UPPSELD

Þýðing: Eyjólfur Kjalar Emilsson sem einnig ritar inngang.

Gorgías er ein glæsilegasta samræða Platons, en um ágæti þessa kunnasta heimspekings sögunnar er óþarft að fjölyrða. Þetta rit telst til hinna svokölluðu sókratísku samræðna, sem Platon ritaði tiltölulega snemma á ferli sínum og eru taldar endurspegla réttilega viðhorf Sókratesar sjálfs. Gorgías fjallar að nafninu til um mælskulist, en þegar líður á verkið leiðir sú rökræða til þess að leita þarf svara við mikilvægum spurningum um mannlegt líferni og stjórnarfar. Hér er að finna eina skýrustu heildarmyndina af siðfræði Platons og hér koma í fyrsta skipti fram ýmsar kenningar sem hann átti eftir að halda áfram að vinna úr í Ríkinu.

Mælskulist var á dögum Platons gríðarlega mikilvægt tæki, ekki hvað síst fyrir hvern þann sem vildi hafa áhrif í stjórnmálum, enda hafði hið talaða orð úrslitaáhrif þegar kom að því að sannfæra samborgara sína. Sókrates samræðunnar gagnrýnir þessa eftirsóttu listgrein harkalega og beitir fyrir sig greinarmuninum á skoðun og raunverulegri þekkingu. Það er aðeins á valdi mælskumannsins að sannfæra áheyrendur sína um hið fyrrnefnda, en skoðanirnar kunna að vera rangar og jafnvel um efni sem hann sjálfur hefur ekkert vit á. Þessi gagnrýni beinist um leið að lýðræðinu sem Platon var alla tíð andsnúinn. Hann taldi að unnt væri að komast að öruggum sannindum um gott og illt, en í lýðræðisríki væri óhjákvæmilegt að ákvarðanir fólksins mótuðust af þeim gervivísindum sem væru mælskulist stjórnmálamanna eða það sem við köllum í dag einfaldlega áróður. Lykilatriðið er í raun og veru það að líferni þess sem beitir fyrir sig mælskulistinni leitast aðeins við að uppfylla langanir og duttlunga hans hverju sinni, en ekki að vera réttvís eða höndla réttnefnda hamingju. Hérna býr að baki sú kenning að réttvísi sé manni sjálfum til góðs, sem er svar Platons við meginvanda allra siðfræðikenninga: hvers vegna ætti að breyta siðferðilega, jafnvel þegar slíkt fer öndvert gegn manns eigin hagsmunum? Hann heldur því fram að siðleysi sé til marks um ójafnvægi og stjórnleysi sálar sem láti stjórnast af ástríðum sínum. Slíkt ástand er sjúkdómur í sálinni og sál sem er sjúk getur vart talist gæfusöm. Þessa hugmynd ásamt fleirum þróar Platon síðan áfram í Ríkinu.

Það er auðséð að umfjöllunarefni Gorgíasar, gervivísindi, áróður, eðli refsinga og hlutverk stjórnmálamanna, svo eitthvað sé nefnt, eru síst minna aðkallandi nú á dögum en á ritunartíma verksins. Í inngangi ritsins er gerð skilmerkileg grein fyrir aðalefnisatriðum þess og frummyndakenningu Platons gerð nokkur skil.

Önnur verk Platons, sem komið hafa út sem Lærdómsrit, eru Ríkið, Menón, Samdrykkjan og Síðustu dagar Sókratesar.

3.990,- / 3.192,-

Grikkland alla tíð

Ýmsir

Á Grikklandi til forna var lagður grundvöllur alls menntalífs Vesturlanda, í listum og fræðum, heimspeki og vísindum. Þessi bók kemur í framhaldi af bókinni Grikkland ár og síð sem hefur að geyma greinar um Grikkland og gríska menningu eftir íslenska höfunda. Hér er farin önnur leið þar sem grískum bókmenntatextum frá ýmsum tímum er komið á framfæri í íslenskum þýðingum. Þetta eru textar af ýmsum toga; sögur, leikrit, ljóð heimspeki og sagnfræði frá síðustu þrjúþúsund árum, m.a.a ljóðaþýðingar úr forngrísku og nýgrísku. Hljómdiskur fylgir með upplestri Kristjáns Árnasonar á Ilíonskviðu.

3.990,- / 3.192,-

Grikkland ár og síð

Ýmsir

Á Grikklandi til forna var lagður grundvöllur alls menntalífs Vesturlanda, í listum og fræðum, heimspeki og vísindum. Bókin Grikkland ár og síð hefur að geyma tuttugu og fimm greinar eftir íslenska samtímamenn, rithöfunda og fræðimenn á ýmsum sviðum. Þær varpa ljósi á ólíka þætti grískrar menningar að fornu og nýju og veita yfirsýn yfir sögu lands og þjóðar. Þá eru í bókinni tveir kaflar með ljóðaþýðingum úr forngrísku og nýgrísku.

3.490,- / 2.792,-

Gróðurhúsaáhrif og loftslagsbreytingar

Halldór Björnsson

Umhverfisrit Bókmenntafélagsins

Eru gróðurhúsaáhrif raunveruleg? Hvaða vísindi liggja að baki fullyrðinga um að loftslag á jörðinni muni breytast á næstu áratugum?

Viðbrögð við loftslagsbreytingum og áhrifum þeirra eru og verða eitt stærsta viðfangsefni heimsbyggðarinnar á komandi áratugum. Í bókinni eru útskýrð þau vísindi sem að baki liggja, saga þeirra rakin og því lýst hvað telst vitað með vissu og hvar óvissan er mest.

Útgáfuár: 2008

3.490,- / 2.792,-

Grundvöllur að frumspeki siðlegrar breytni

Immanuel Kant

Þýðing: Guðmundur Heiðar Frímannsson sem einnig ritar inngang.

Immanuel Kant er tvímælalaust einn merkasti heimspekingur sögunnar. Jafnvel þótt undan væru skilin hin gríðarlegu áhrif sem verk hans hafa haft á aðra hugsuði eru röksemdafærslur hans enn uppspretta lifandi umræðu á flestum sviðum heimspekinnar og full ástæða til að taka þær alvarlega.

Grundvöllur að frumspeki siðlegrar breytni er eitt víðlesnasta rit Kants og jafnframt eitt það aðgengilegasta. Ritið gefur greinargóða hugmynd um siðfræðikenningu hans, sem telst til einnar af helstu stefnunum í siðfræði nútímans. Þó var því ekki ætlað að gera tæmandi grein fyrir siðferði, heldur var markmiðið að sýna fram á að til væru siðferðislögmál um breytni og hver væri æðsta meginregla siðferðisins. Kant leit svo á að það eina sem væri í sjálfu sér gott, óháð ytri aðstæðum, væri góður vilji. Það sem gerir breytni einhvers siðferðilega rétta er ekki löngun hans til að breyta rétt eða afleiðingarnar, heldur að ástæða athafnarinnar sé skyldurækni. Siðferðislega rétt athöfn er með öðrum orðum sú sem stjórnast af lífsreglu sem gerandinn getur viljað að verði að algildu lögmáli. Þetta er hið skilyrðislausa skylduboð, sem Kant nefnir svo til aðgreiningar frá skilorðsbundnum skylduboðum, sem kveða á um hvað skuli gera til að ná ákveðnu markmiði. Hverjum manni ber að haga lífsreglum sínum þannig að ekki myndi leiða til mótsagnar þótt þær yrðu gerðar að algildum lögmálum. Þannig er siðferðilega rangt að svíkja loforð eftir hentugleikum, vegna þess að í samfélagi þar sem allir stunduðu slíkt myndi verða ómögulegt að lofa nokkru. Hið skilyrðislausa skylduboð orðar Kant líka þannig að ávallt beri að koma fram við manneðlið, sjálfan sig og aðra, sem markmið í sjálfu sér en ekki aðeins eins og tæki til að koma fram markmiðum. En úr því að allar
skynsemisverur eru grundvöllur siðaboðsins og fyrst það gildir fyrir þær sjálfar, lítur Kant svo á að það sé okkar eigin vilji sem skuldbindur okkur til að fara eftir því.

Kenning Kants er glæsileg og hugsunin dýpri en svo að henni verði gerð skil í fáum orðum. Sérstaklega ítarlegur inngangur Guðmundar Heiðars Frímannssonar um líf Kants, siðfræði og heimspeki almennt fylgir þessu riti, auk þriggja viðauka í bókarlok.

5.500,- / 4.400,-

Guðfræði Marteins Lúthers

Sigurjón Árni Eyjólfsson

Guðfræði Marteins Lúthers hefur haft mikil áhrif á Íslandi en ýmis atriði hennar hafa verið almenningi óljós. Þannig er mörgum hulið að áherslan á samhjálp og hin margrómaða barnatrú geyma í raun kjarnann í guðfræði Lúthers. Með ritverki þessu er í fyrsta sinn á íslensku gerð heildstæð úttekt á guðfræði Lúthers.

Útgáfuár: 2000

12.900,- / 10.320,-

Guðjón Samúelsson húsameistari

Pétur H. Ármannsson

Guðjón Samúelsson var fyrstur Íslendinga á 20. öld til að ljúka háskólaprófi í byggingarlist. Hann var skipaður í stöðu húsameistara ríkisins í apríl 1920 og gegndi því embætti í þrjátíu ár, allt til dauðadags árið 1950. Á þessu tímabili hannaði hann ásamt samstarfsmönnum sínum flestar opinberar byggingar hins fullvalda ríkis og gaf helstu stofnunum þess sýnilegt og áþreifanlegt form. Guðjón kom einnig að skipulagsmálum, gerði skipulagsuppdrætti að ýmsum helstu bæjum landsins og var ráðunautur stjórnvalda um skipulagsmál. Hann sá borgir og bæi fyrir sér sem heilsteypt listaverk sem hefðu heilladrjúg áhrif á heilbrigði íbúanna og vellíðan.

Í þessari bók skoðar höfundurinn, Pétur H. Ármannsson, verk og hugmyndir Guðjóns Samúelssonar út frá sérstöðu hans sem háskólamenntaðs arkitekts sem var mótaður af straumum og stefnum í norrænni og evrópskri byggingarlist á fyrstu áratugum 20. aldar. Pétur beinir athygli að því hvernig Guðjón nýtti menntun sína og þekkingu við sérstakar og erfiðar aðstæður sem gáfu honum þó tækifæri til víðtækari áhrifa á manngert umhverfi í landinu en nokkrum öðrum íslenskum arkitekt hefur hlotnast fyrr eða síðar.

9.900,- / 7.920,-

Gunnlaugur Halldórsson arkitekt

Pétur H. Ármannson

Gunnlaugur Halldórsson arkitekt (1909–1986) hefur réttilega verið nefndur fyrsti módernisti íslenskra sjónlista. Starfsferill hans spannar öll skeið stefnunnar. Saga hans er rakin í bókinni og hana prýðir fjöldi ljósmynda og teikninga af verkum arkitektsins auk verkaskrár og útdráttar á ensku.

9.900,- / 7.920,-

Halldór H. Jónsson arkitekt

Pétur H. Ármannsson og Björn Jón Bragason

Halldór H. Jónsson (1912–1992) er í senn kunnur sem arkitekt þjóðþekktra bygginga og einn helsti áhrifamaður í íslensku athafnalífi á 20. öld. Samhliða rekstri eigin teiknistofu varð hann snemma eftirsóttur til forystustarfa í atvinnurekstri og var á seinni árum gjarnan nefndur „stjórnarformaður Íslands“ vegna setu sinnar í stjórnum stórfyrirtækja. Þrátt fyrir áhrif hans og tengsl í íslensku þjóðlífi hélt Halldór sig alla tíð til hlés á opinberum vettvangi og veitti afar sjaldan viðtöl í fjölmiðlum. Sagan af ævi og athöfnum Halldórs H. Jónssonar er merkur en lítt þekktur kapítuli í sögu atvinnulífs og byggingarlistar á Íslandi á 20. öld. Í bókinni er fjöldi ljósmynda og teikninga ásamt skrá yfir verk arkitektsins.

3.490,- / 2.792,-

Handan góðs og ills

Friedrich Nietzsche

UPPSELD

Þýðing: Þröstur Ásmundsson og Arthúr Björgvin Bollason sem einnig ritar inngang.

Nietzsche er líkast til sá heimspekingur sem frægastur er utan raða fræðimanna, hann er í senn dáður og alræmdur. Fáir heimspekingar hafa verið mistúlkaðir jafnhrapallega en á fáum er líka jafnerfitt að henda reiður. Sjálfur lýsti hann sér svo að hann væri ekki manneskja heldur dínamít.

Handan góðs og ills, sem upphaflega kom út árið 1886, er eitt af höfuðverkum Nietzsches og að mörgu leyti besti inngangurinn að heimspeki hans. Þótt verkið hafi form fjölda stuttra og oft sundurlausra greina eins og mörg önnur rit hans, eins þótt þar skiptist á sjónarhorn og málflutningurinn orki á köflum þversagnakenndur, er það þegar öllu er á botninn hvolft heilsteypt og hrífandi. Og þar birtist djúp og næm hugsun Nietzsches um viðfangsefni sín: siðferðið, sannleikann og heimspekina. Mikið fer fyrir gagnrýni á vestrænar siðferðishugmyndir; þrælasiðferði trúarinnar sem þjakar mannsandann, siðferðilega nytjahyggju og hjarðmennsku. Í því sem hann kallar „náttúrusögu siðferðisins“ leitar hann róta siðferðisins og rekur hvernig hann telur að það hafi úrkynjast. Hann deilir líka hart á ýmsa heimspekinga fyrri tíma og glórulausa leit þeirra eftir sannleikanum og boðar nýja manngerð og nýja tegund heimspeki sem ekki byggir á slíku annarlegu verðmætamati og siðferðisfordómum. Það sem koma skal eru frjálsir andar.

Nietzsche er þó ekki rétt túlkaður þannig að hann sé boðberi eiginlegs siðleysis. Það sem hann hvetur til er heldur fordómalaus og djörf endurhugsun allra gilda. Framsetning hans er aftur á móti vægðarlaus og hárbeitt. Honum er einkar lagið að tjá hugsun sína á skarplegan og lifandi en jafnframt meitlaðan hátt, með myndrænni hugsun og næmri tilfinningu fyrir málinu. Honum er í nöp við alla hálfvelgju, enda eru yfirlýsingar hans stórorðar. Allt gerir þetta Handan góðs og ills að skemmtilegri og töfrandi lesningu, sem vekur lesandann jafnframt til djúprar umhugsunar. Hann á ekki annars kost en að stíga inn í verkið og taka afstöðu til gagnrýni Nietzsches, reyna að ráða fram úr hinum óvæntu myndlíkingum hans og komast að því upp á eigin spýtur hver sé hinn eiginlegi boðskapur höfundar.

Þessari vönduðu þýðingu fylgir allítarlegur inngangur Arthúrs Björgvins Bollasonar þar sem lífshlaup höfundarins og ýmis meginstef heimspeki hans eru rakin.

12.500,- / 10.000,-

Hæstiréttur í hundrað ár – Ritgerðir

Þess er minnst 16. febrúar 2020 að 100 ár eru liðin frá því að Hæstiréttur Íslands tók til starfa. Saga réttarins er samofin sjálfstæðisbaráttu Íslendinga og þegar Ísland varð frjálst og fullvalda ríki náðist sá mikilvægi árangur sjálfstæðisbaráttunnar að æðsta dómsvaldið í málefnum Íslendinga færðist í hendur þeirra sjálfra með stofnun Hæstaréttar árið 1920. Í riti þessu sem hefur að geyma 18 ritgerðir eftir 22 höfunda er fjallað um valda málaflokka og réttarsvið sem hafa verið til umfjöllunar á þeim hundrað árum sem liðin eru frá stofnun réttarins og hann hefur komið að því að móta með einum eða öðrum hætti.